१५,००० लिटर बायो डिझेलची रातोरात विक्री – नांदुरा पोलिसांच्या छत्रछायेखाली माफियांचा उधळपट्टा?

सचिनच्या बायो डिझेल पंपाला पोलिस कर्मचाऱ्यांचा आशीर्वाद? – अवैध साठवणुकीमुळे नागरिक धास्तावले

नांदुरा (प्रतिनिधी): वडनेर भोलजी परिसरात सुरु असलेल्या अवैध बायो डिझेल साठवणुकीमुळे परिसरातील नागरिकांमध्ये भीतीचे वातावरण निर्माण झाले आहे. विशेष म्हणजे, सचिन नावाच्या इसमाचा हा बायो डिझेल पंप एका नामांकित पोलिस कर्मचाऱ्याच्या आशीर्वादाने बिनधास्तपणे सुरू असल्याचा आरोप नागरिकांनी केला आहे.

स्थानिक नागरिकांच्या म्हणण्यानुसार, सचिन हा कोणत्याही अधिकाऱ्याची भीती न बाळगता दिवस-रात्र ज्वलनशील आणि स्फोटक पदार्थांची साठवणूक व विक्री करत आहे. हा धंदा सुरू राहण्यासाठी त्याला पोलिस कर्मचारी विक्रम राजपूत यांचा सक्रिय पाठींबा लाभत असल्याचा आरोप करण्यात येत आहे. विशेष म्हणजे, विक्रम राजपूत हे ‘माऊली ढाबा’चे मालक यांचे नातेवाईक असून, त्यामुळेच पोलीस यंत्रणा कारवाईस टाळाटाळ करत असल्याची चर्चा आहे.

नागरिकांनी या प्रकरणाबाबत नांदुरा पोलीस ठाण्याचे ठाणेदार श्री. विलास पाटील तसेच वडनेर ओ.पी.चे इंचार्ज श्री. बांगर यांना अनेक वेळा फोन कॉल आणि व्हॉट्सअ‍ॅप संदेशाद्वारे माहिती दिली, मात्र अद्याप कोणतीही ठोस कारवाई झालेली नाही. परिणामी, बायो डिझेल माफिया सचिन याने काल रात्री तब्बल १५,००० लिटर पेक्षा जास्त बायो डिझेलची विक्री केल्याची धक्कादायक माहिती पुढे आली आहे.

प्रशासनाचे दुर्लक्ष, पोलिसांची अनास्था आणि माफियांना मिळणारा पाठिंबा यामुळे स्थानिक नागरिकांमध्ये तीव्र नाराजी असून, या गंभीर प्रकरणाकडे प्रशासनाने तात्काळ लक्ष न दिल्यास तीव्र आंदोलन छेडण्याचा इशारा काही सामाजिक कार्यकर्त्यांनी दिला आहे.