मलकापूर : MIDC टोल टॅक्सजवळ अवैध बायो डिझेल पंप उघड! प्रशासनाला फसवून जमीनीत लपवलेली टाकी; ज्वलनशील पदार्थाची खुलेआम विक्री

मलकापूर (प्रतिनिधी) : मलकापूर येथील MIDC टोल टॅक्स जवळ, दसरखेड पोलीस स्टेशनच्या हद्दीत एका बायो डिझेल पंपद्वारे अवैधरीत्या ज्वलनशील पदार्थ साठवून त्याची विक्री केली जात असल्याचा धक्कादायक प्रकार उघडकीस आला आहे.

स्थानिक नागरिकांकडून मिळालेल्या माहितीनुसार, अमजद हनीफ खान यांनी प्रशासनाला सांगितले होते की त्यांचा बायो डिझेल पंप बंद आहे कारण त्यांची तब्येत खराब आहे. मात्र प्रत्यक्षात त्यांचा मुलगा शाहिद अमजद खान हा पंप सुरु ठेवून अवैधरित्या बायो डिझेलचा व्यवसाय करत असल्याचे निदर्शनास आले आहे.

विशेष म्हणजे या पंपाची टाकी जमिनीत लपवून ठेवण्यात आली असून, कोणतेही परवाने वा अधिकृत कागदपत्रे नसताना खुलेआम ज्वलनशील पदार्थाची साठवणूक व विक्री केली जात आहे. हे सर्व प्रकार MIDC पोलीस स्टेशनच्या हद्दीत घडत असून, अद्याप यावर कोणतीही ठोस कारवाई झालेली नाही.

या प्रकरणाकडे शासन आणि प्रशासनाने तातडीने लक्ष घालून संबंधितांवर कठोर कारवाई करावी, अशी मागणी स्थानिक नागरिकांकडून होत आहे.